Жаңалықтар

Phygital Basketball: Шешуші матчтардың аналитикасы:

• Финал цифрлық кезеңде жоғары қарқынмен басталды. Wilders ойыншылары виртуалды симуляторда өз тактикасын сәтті қолданып, 19:16 есебімен басымдыққа ие болды.
• Физикалық паркетке өту шешуші кезең болды. Wilders қатаң қорғаныс құрып, себет астында үстемдік етті және нақты алаңда атақты қарсыластарын 17:10 есебімен ойсырата жеңді.
• Үшінші орын үшін матч та тартысты өтті. Dangerous командасы 39:36 есебімен аяқталған ауыр текетіресте Triada құрамынан қола жүлдені жұлып алды.
• Виртуалды алаңда Triada құрамы сәл дәлірек әрекет етіп, цифрлық кезеңді 19:18 ең аз басымдықпен жеңіп алды.
• Үшінші орын үшін серияның тағдырын физикалық төзімділік шешті. Dangerous нақты кортта қарқынды күшейтіп, қарсыласынан 21:17 есебімен басым түсті және қорытынды жеңісті қанжығасына байлады.

«Біздің командадағы ең бастысы, бұл химия, соңына дейін күресуге дайын болу және бір-бірімізді қорғай отырып, бапкердің нұсқауларын бұлжытпай орындау, - деп пікір білдірді жеңіс туралы Wilders командасының атлеті Сергей (AcademiK) Козлов. - Біз LIGA PRO TEAM ұжымымен цифрлық кезеңде тең ойын болатынын түсіндік. Физикалық бөлік өте қиын болды, мұнда бар-жоғы үш минут ішінде шаршайсың. Бірақ біздің мерген Сэм өз ісін жасады, оған қорғаныста кім тұрғаны маңызды емес, ол жай ғана лақтырады және дәл тигізеді. Біз бар күшімізді салдық, бұл жолы сәттілік біздің жағымызда болды». 

Wilders командасының ойыншысы Семен (Sam) Дебда команданың екі дүркін жеңімпаздардан чемпиондық атақты тартып алу ұмтылысын көрсететін финалдың жоғары қарқындылығын атап өтті:

«Ең алдымен, бұл жеңіске деген ұмтылыстан туындайды. Бұл біздің Wilders деген атауымызда жатыр. Біз алға жылжуды жалғастырамыз және әр ойында бар күшімізді саламыз. Олар керемет команда, сондықтан екі дүркін чемпиондарды жеңу біз үшін өте маңызды».

Dangerous командасы Triada-ны 39:36 есебімен жеңу арқылы үшінші орынды иеленді. Dangerous ойыншысы Марко (Kolja) Кольевич мәлімдегендей:

«Біз мұнда үздік төрттікке кіру мақсатымен келдік, бірақ үштікке іліктік. Менің ойымша, біз бұл медальға лайықпыз. Қолдағандарыңыз үшін және бізге сенгендеріңіз үшін барлығына рақмет».

Пәннің 16 қатысушысы арасында жүлде қорын бөлу:

• 1 орын: Wilders - 100 000 доллар.
• 2 орын: LIGA PRO TEAM - 60 000 доллар.
• 3 орын: Dangerous - 35 000 доллар. 

Жартылай финал үшін тартыс: MOBA PC Dota 2 ширек финалдарындағы камбэктер мен тактикалық икемділік 

MOBA PC Dota 2 Presented by CenterCredit (жүлде қоры 1 миллион доллар) пәніндегі 1/4 финал кезеңі турнирдің үздік төрт командасын анықтады. Матчтар бастаманың күрт өзгеруімен және шиеленісті шешуші карталармен ерекшеленді. Интрига соңына дейін сақталды, ал командалар нағыз тактикалық шеберлікті паш етті. 

Шешуші матчтардың аналитикасы:

• PlayTime командасы GLYPH ұжымына қарсы үш картадағы ауыр сынаққа төтеп берді. Олар шешуші ойынға өз стратегиясын сауатты бейімдеп, қарсыласын тығырыққа тіреді.
• Team Resilience Xtreme Gaming-ке қарсы серияда нағыз мінез көрсетті. Бірінші картада есе жіберіп алғанымен, команда керемет камбэк жасап, қорытынды жеңісті жұлып алды.

«Матчтар алдында біз бірлескен дайындыққа бірнеше сағат жұмсадық, өзіміздің де, қарсыластың да батырлар пулын талқыладық, - деп атап өтті PlayTime ойыншысы Ануча (Jabz) Джиравонг. - Бізде серияға нақты жоспар болды және біз үшінші ойын алдында уақытында қайта құрылдық. Басты айырмашылық әр команданың мұнара астындағы дайвтарды қаншалықты сапалы жүзеге асырғанында болды».

Team Resilience ойыншысы Шаохань (YSR-04E) Ян Xtreme Gaming-ті жеңудің кілті жаттығу ойындарының тәжірибесі болғанын атап өтті:

«Біз олармен практарда көп ойнадық, сондықтан олардың батырларын өте жақсы білдік. Біз Конгбо (Niu) Ли өзін сенімді сезінетін кейіпкерді алдық және менің ойымша, біздің формамыз біртіндеп жақсарып келеді».

Жалпы жүлде қоры 4,65 миллион долларды құрайтын «Болашақ ойындары 2026» (GOTF 2026) powered by Samruk-Kazyna турнирі Астанада 9 тамызға дейін өтеді. Ұйымдастырушы, Қазақстан Республикасы Туризм және спорт министрлігі мен Астана әкімдігінің қолдауымен «Қазспортинвест» АҚ.

Жарыс бағдарламасы жалғасуда. 4 тамыздан бастап Phygital Football UFL, Phygital Shooter CS 2 және MOBA Mobile MLBB бойынша турнирлер басталады. Phygital Dancing бойынша жарыстар 6-7 тамызда, ал Phygital Fighting бойынша 8 тамызда өтеді.

• Турнир ұйымдастырушысы: ҚР Туризм және спорт министрлігі мен Астана қаласы әкімдігінің қолдауымен «Қазспортинвест» АҚ.
• Титулдық демеуші: Samruk-Kazyna АҚ.
• Ресми демеуші: Туризм және спорт индустриясын қолдау қоры Sportqory